ゆくしぐとぅニュース

城間：はいさいぐすーよー、ちゅーうがなびら、城間三良（ぐすくまさんらー）やいびーん。ゆくしぐとぅニュースぬ時間なといびーん。
　今日（ちゅー）最初ぬニュースや、普天間基地ぬ「移設」問題やいびーん。まーんかい「移設」すーがんでいち大騒動（うふそーどー）しち、とぅぬまーぬーそーたぬ鳩山首相やいびたーしが、昨日（ちぬー）ぬ夜（ゆる）、首相官邸うとーてぃ、鳩山首相どぅーくる記者会見しち、「移設先や火星んかい決定しちゃん」でぃ発表さーびたん。記者団からや驚き（うどぅるち）ぬ声（くい）ぬ上がたんでぃゆぬくとぅやいびーしが、「本当（ふんとー）火星るやいびんな？」んでぃゆぬ記者ぬ質問かい答え（いれー）てぃ、「我んねー嘘物言い（ゆくしむにー）やさん。ウチナーぬ皆さんぬ負担軽減ぬたみなかい、汗水（あしみじ）ん流ち火星人とぅ交渉すーぬ考げーやん」んでぃ言ち、鳩山スマイル見したんでぃゆぬくとぅやいびーん。
　くぬくとぅんかい平野幹事長や「あぬ御方（うかた）や宇宙人るやいびーくとぅ……」んでぃ言ち、面（ちら）んわじゃでぃ記者ぬ質問から逃げた（ひんぎたん）でぃゆぬくとぅやいびーん。
　岡田外相や口あーふらちしち、一時（いっとぅち）や物（むぬ）ん言いゆさんたんでぃゆぬくとぅやいびーしが、色（いる）そーかーなてぃ、「アメリカ政府ぬ納得すがーやー」んでぃ言ち、じこー心配（しわ）しちょーぬふーじーやたんでぃゆぬくとぅやいびーん。
　また、我ったーウチナーぬ仲井真知事や「政府からちゃんとした説明ぬ無（ね）－らんくとぅ、何（ぬ）－んでぃ言ちしみがすら分からん」んでぃ言ち、新聞記者んかい「ちゃーなとーるばーが？」んでぃ逆質問しちょーたんでぃゆぬくとぅやいびーん。
　今日（ちゅー）やスタジオんかい琉球大学ぬ大城次良（うふぐしくじらー）教授ぬめんそーちょーいびぐとぅ、昨夜（ゆーび）ぬ鳩山首相ぬ発表んかい、解説お願い（うにげー）さーびらんでぃ思（うむ）といびーん。大城先生（うふぐしくしんしー）、ゆたしくうにげーさーびら。
大城：はいはい、よろしくございます。
城間：普天間基地の移設先や火星、んでぃゆぬ鳩山首相ぬ発表、大城先生やちゃんち聞（ち）みそーちゃがや？
大城：平野幹事長とぅゆぬぐとぅ、我んにーん、さすが宇宙人！んでぃゆーしが最初ぬ感想やいびたん。やしが、実は（じちぇー）くぬ話んでぃゆーしや、一部うとーてぃや前（めー）から噂さってぃういびたん。民主党ぬＯ幹事長とぅか、自民党ぬＫ元防衛大臣とぅか、国民新党ぬＳ議員とぅか、火星ぬ「移設」予定地に土地購入そーんでぃゆぬ噂ぬん流りとーぬあたいやいびてーくとぅ、宇宙人首相やれー思い切った選択んあいがすら分からん、んでぃゆぬ声（くい）ぬん聞（ち）かりやさーびたん。
城間：あいるやんせーてぃな。あんしねー大城先生や、あんすかまでぃや、どぅまんぎやしみそーらんてーさや。
大城：あねーあいびらん。いかな宇宙人首相やらばん、実際に火星んかい決定すんでぃゆーしや、さすがに無（ね）んがはじんでぃゆーしが、正直な予測やいびたん。
城間：火星うとーてぃや、ヘリコプターとぅかオスプレイとぅか回転翼機ぬ訓練やならのーあらんに、でぃゆぬ疑問ぬ声（くい）ぬあいびーしが？
大城：そもそも火星うとーてぃいかな訓練しちん、地球うとーてぃや役に立たのーあらんな？んでぃゆぬ疑問ぬんあいびーん。
城間：あんしねーアメリカ政府ぬ納得しーぎさーやあいびらんさや。
大城：アメリカ政府ぬ納得すんでぃゆぬくとぅや無（ね）－らんでぃ思（うむ）やびーしが、ただ、くぬ問題んでぃゆーしや、アメリカぬちゃんぐとーる思（うむ）ゆがんでぃゆぬくとぅよかー、ウチナーぬ意見、まず第一に尊重すーしがる当たり前（あてーめー）やる、んでぃ我（わ）んねー思（うむ）といびーん。日米安保体制ぬ下（むとぅ）うとーてぃ６５年間、難事恨事（なんじくんじ）しちちぇーしがウチナーるやいーびくとぅ、本当（ふんとー）やまんーんかい移設すん、でぃゆぬ話やあらんぐとぅ、普天間基地や無条件返還すーしが当たり前（あてーめー）やあいびらんがやー。
城間：大城先生ぬ言ーみしぇーぬぐとぅんでぃ、我んにん思（うむ）やびん。火星うとーてぃや鳩山首相ぬ発表ぬ後（あとぅ）、しぐ反対ぬ声（くい）ぬ上がとーんでぃゆぬくとぅやいびーしが？
大城：アメリカ軍やまーかい持（む）っちいじん、はごーさーさってぃ、かしまささーりんでぃゆむくとぅやいびーさ。いかな油口（あんだぐち）さーばん、米軍基地んでぃゆーしや人殺（ちゅーくる）すぬ訓練すーぬ所（とぅくま）るやいびーくとぅ、無（ね）－らんしがましんでぃゆーしや、ウチナーやらばん、徳之島やらばん、ヤマトゥやらばん、火星やらばん、世間御万人（しきんうまんちゅ）ぬ考げーや同じ（ゆぬ）むのーやあいびらんがやー。
城間：あんやいびーさー。大城先生、あんしね……、今（なま）新しいニュースぬ入っちちゃーびたん。鳩山首相や昨夜ぬ、移設先や火星んでぃゆぬ決定、取り消ししちゃんでぃゆぬくとぅやいびーん。
大城：あきさみよーなー。
城間：大城先生、取り消しんでぃゆぬニュース、ちゃんち考げーりばしまびーがや？
大城：宇宙人ぬ考げーんでぃいうしや、我ったーがやなかなか理解ないびらんしが、地元合意ぬ難（むち）かさんでぃ思（うむ）いやさーびらんたがやー。
城間：ウチナーん徳之島ん反対しちょいびーくとぅ、いよいよ行き詰まり、かかいまちぶいぬん深まとーぬふーじーやいびーしが、打開やないびーがや？
大城：あまなすん、くまなすん、んでぃいち悩まんぐとぅ、オバマ大統領んかい、６５年なー哀りしみらってぃ、ウチナーぬ御万人（うまんちゅ）や、なーにじららん、んでぃ言ちょいーびーぐとぅ、米軍基地やうんじゅなーたーどぅーぬシマんかい持（む）っち帰（けー）りみそーりんでぃ、はっきり言いいばしみぬくとぅやいびーさ。
城間：じゅんに、日本政府ぬんアメリカんかいはっきり物（むぬ）言らんねーないびらんさーやー。いちまでぃんアメリカぬ尻追い（ちびうーやー）しちょーてぃやないびらんしが。ちゅーやなー時間なといびーん。大城先生、にふぇーやいーびたん。
大城：ご無礼（ぐぶりー）さーびたん。
城間：ゆくしぐとぅニュース、提供やシーミーに欠かせない平御香（ひらうこー）の製造・販売元グソー商会やいびたん。あんしねーまたいちか。
　
♪♪テンクテンクテンクテンク…♪♪