シマ言葉の日

Ｍ：昨日１８日や「シマ言葉の日」えったんばーえっしが、あんすか盛り上がとぅぬぐとぅやねんたさーやー。
Ｓ：行政があびたとぅりち、簡単にシマ言葉ぬちからりぬむぬやあらんとぅや。めーなちぬ生活ぬ中じシマ言葉使いぬ機会ぬねんねーや、ちゃっさ呼びかきてぃん若せーしたーが習てぃまーりいうぬ気持ちにやならんばーらんな。
Ｍ：実用性考えーりば、シマ言葉習いしよか英語習いしましり思いぬちゅーがるまんどぅがはじえっとぅや。生活範囲ぬ拡大しち、マスメディアぬん発達しち、シマ言葉じコミュニケーションとぅいぬ機会ぬいけらくなってぃ、また、都会ないしんでーあまくまから来ーぬちゅーぬまんちゃーなてぃ、ゆぬシマンチュりいうぬ意識ん生まりぐるせーとぅや。
Ｓ：わったー世代や復帰運動ぬ中じ「標準語励行運動」あたてーぬ世代えっとぅよ、うりじシマ言葉話しゆさんくなってーしたん、まんどぅんばーてー。男生徒や先生がちゃっさ言いしきてぃん聞かんぐとぅ、方言ちかたっくたんばーえっしが、女生徒や先生たーが言うし聞くとぅや、シマ言葉ちけーゆさんくなっとぅんばーよ。母親がシマ言葉ちけーゆさんばーえっとぅ、文字通りシマ言葉が「母語」とぅしち消滅しちいじゅんばーえっさ。
Ｍ：言葉が消滅しーば文化創造に与いぬ影響ぬんまぎせーとぅや、何とか残さんねーならんばーえっしが。
Ｓ：うぬ気持ちやちゃっさんぬちゅーぬ持っちゅとぅ、「シマ言葉の日」りいうしん設定さっとぅんばーえっしが、現実やどぅく厳しいなてぃや。我んぬん小説じ、どぅーぬシマぬ言葉ちかたいしちゅんばーえっしが、うり読でぃちゃぬあたいぬちゅーぬ理解ないがりいうしや、否応なく直面すーぬ問題えんばーて。ほとんどぬちゅーぬ理解ならーぬ言葉じ小説書ち、うぬ作品にちゃんねーぬ意味ぬ有いが？あんち問ーらりねー、ぬーりいれーるがりいうぬ問題えんばーえさ。実験小説とぃしちぬ意味や有いてぃん、結局や自己満足じ終わーりやさんがや、りいうぬ気持ちぬんすんばーよ。
Ｍ：作品とぅしちシマ言葉中心に表現しーねー、いざ発表さーり思てぃん、ヤマトゥぬ文芸雑誌にやまず無理えんや。ヤマトゥンチューが読でぃん理解ないぬあたいぬ妥協的な表現さんねー通用さんばーえっとぅや。
Ｓ：表現上ぬ制約が有いとぅ工夫ぬん必要なてぃ、独自ぬ文体ぬ生まーりぬ側面ぬん有いとぅや、むるがむるダメりいうぬわけやあらんしが、シマ言葉ぬ要素ちゅーみらーり思いねーや、個人誌かブログじ発表するしかねんがはじや。
Ｍ：うり考えーりばブログがでぃきたんでぃいうしやまぎせーさーや。うぬ会話えってぃん、シマ言葉ちかてぃん簡単に公表なんばーえっとぅ。
Ｓ：ブログんいい手段やえっしがや、ただ、活字じ発表すーぬ努力んやっぱり必要えんばーよ。我や祖父母、両親やもちろん、同級生たーぬんむるシマ言葉ちかてぃ話すーぬ環境じぷどいてぃよ、高校卒業しち大学に入るか共通語ん学校ぬ授業ぬばーぐらいしかちからんたんばーよ。今帰仁かい生まーりてーとぅ、あんねーぬ環境ぬんあいたんばーえっしが、シマ言葉母語としちぷどいてぃ、なまんうりちかてぃ生活しち、うりちかいままー死じいくぬ世代としちや、うぬ言葉ぬ文学とぅしちぬ可能性、ないぬうっぴー生かちみーぶせんばーてー。読みぬちゅーや限らっとぅんで思いしがや、うりさんぐとぅや死ならんしが。
Ｍ：世界中ぬ少数言語ぬ、消滅ぬ危機にあんばーえっしが、ゆぬ考えー持っち書ちゃっくぬ小説家・詩人や、世界ぬあまくまに居いがはじえっさ。
Ｓ：物書ちゃーや作品が全てえっとぅや、形とぅしち残さんねーならんばーえっさ。ウチナーぬ言葉じんうぬあたいぬ表現、小説作品ぬないたんどーりちや。