セスナ機と一村

Ｍ：をぅってぃーやどーきらーアメリカーたーかい、しかまさったーさーや。
Ｓ：セスナ機じ墜落しちぇーぬアメリカーたーな？
Ｍ：救急車からパトカーから消防車からサイレン鳴らち走らち行ちゅせーやー。ウチナーぬむんびけーやあらん、アメリカ軍ぬむぬん、ちゃー行ちすーせー、とー、うりやまぎ事故ぬ有いてーさー、米軍車両ぬ交通事故る起くちぇーがやーり思たんばーえっしが、どぅくぬ騒ぎようから、ゆーさんねー北部訓練場じヘリぬ墜落しちゃい、大事故ぬ起くいやさんたがやーり思たんばーえっさ。テレビぬニュース見っちゃとぅ、セスナ機ぬ墜落事故えったんばーえっしが。
Ｓ：いーばーウジ畑に落ちてんやー。家ーぬ上ーびんでーえーねー大事すーてーしが。
Ｍ：事故ぬ原因や燃料切れぬ可能性ぬん有んでぃるいゅーとぅよ。うぬとっとろーアメリカーたーや、奄美大島から嘉手納基地までぃ、ちゃぬあたいぬ燃料ぬ必要りいうしん考えゆさんたーばーれーがや。
Ｓ：あんすとぅよ。をぅってぃーや天気んあんすか悪っくねんてーとぅや、燃料切れえーねー全くぬ初歩的なミスじ墜落しちぇんばーえっさ。うぬあたいぬ能力しかねーぬ者ぬちゃーぬ飛じゃっくんばーえっとぅ、よんがしむんえっさ。
Ｍ：戦闘機とぅかヘリコプターびけーあらん、セスナ機までぃなー、はーウチナーぬ空やアメリカーたー勝手るえっさやー。
Ｓ：セスナ機や軍事上ぬ機密やねんがはじえっとぅ、県警に捜査しみとぅんばーえっしが、うりが米軍機んでーえーねー、傍に寄らしんさんてんやー。
Ｍ：日本政府やアメリカ第一るえっとぅやー、佐藤政権時代に「セスナ機墜落に関する日米の合意事項」りいうぬ「密約」ぬ交わさっとぅがすら分からんどー。ウジ畑ぬ焼きりねー日本政府ぬ負担します、とぅかや。
Ｓ：戦後ぬ日本政府ぬ姿勢からしーねー、冗談りち笑てぃや済まさらんさーやー。むる密約、密約るえっとぅ。
Ｍ：「日本政府の政権交代に関する日米間の合意事項」りいうぬ密約やねんがやー。
Ｓ：まさかやー。まー、あい言ゃーらぬたみにん、民主党ぬ政権取いねー、戦後ぬ日米間ぬ密約やむるばっかすんどー、りち政権公約しちめーすーしがやー。対米追従外交から転換すんでぃ言うぬあたいえーねーやー。話や変わいしが、先々週や用事ぬ有てぃ、うぬアメリカーたーが飛じちゃんでぃいうぬ奄美大島んかい行じゃんばーえっしがよ、折角ぬ機会えっとぅ田中一村美術館にん行じゃんばーて。
Ｍ：ちゃんちえったが？
Ｓ：一村美術館や二回目えったしがてー、改みてぃやー、一村でぃいうぬちゅーや最後ぬ十年じ飛躍しちゃんでぃうまりーたーさーやー。奄美にちーホーピル（アカショウビン）とぅかゴーイ（喰わず芋）とぅかアダン葉ー描ちぇーぬ最後ぬ十年とぅ、うぬ前ーぬ絵とぅやや、技術ぬ連続性や有いてぃん、絵ーから伝わてぃすーぬ雰囲気りいうしや、別ぬ次元ぬむんえっさーやーり思たんばーてー。うぬ違いや何ーえんばーがーやーり考えーるんばーえっしが。
Ｍ：奄美ぬ風土ぬ影響とぅ、中央画壇から完全に縁ぬ切りてぃ、腹括ったんでぃいうしがまぎせーたんばーやあらんな？
Ｓ：うりや誰るえってぃん考えーるんばーよ。実際にうりん有いたんでぃ思いしが、ただや、うんねーぬ条件ぬ有いたとぅりち、むるがむるあんねーぬ飛躍ないぬわきや有らんとぅやー。ある人間ぬ芸術表現ぬ飛躍すんでぃいうしや、極度ぬ集中力や最低限ぬ条件とぅしちん、簡単に説明ならぬ何ーげらぬ有んでぃ思いしが。
Ｍ：あい言ゃーりねーいれーよーがねんしがよー。
Ｓ：今年や一村ぬ生誕１００年えったんでぃいうぬくとぅえっしが、死じからあんち評価さーりんでぃいうしや、簡単に有いぬくとぅやあらんとぅや。てーげーぬちゅーや評価ぬ下がてぃ忘しらりんばーるえっとぅ。
Ｍ：来年や７月に奄美大島じ皆既日食ん見らりんでぃいうせーやー。ちゃっさんぬちゅーぬ見ーがすんばーあらんなー。
Ｓ：奄美パークじうぬ皆既日食ぬ件じ講演会とぅシンポジウムんしちゃっくたーしがてー、島ぬちゅーたーやでーじな期待しちゅんばーえっさ。宿泊、航空便その他、受け入れ態勢ぬ問題ぬまんどぅぬふーじーえったしが、期待通りに企画ぬ成功しーばーしむしがやーり思いたーさーや。皆既日食とぅ一村ぬ絵ー同時に見らりねー、あんち良いくとぅやねんしが。