大江・岩波沖縄戦裁判控訴審３

Ｍ：梅雨が終わーたがやーり思たとぅ雨ぬうぽーくなてぃや。
Ｓ：あんすとぅよ。夜ぬうちに降いしや、しださぬ上等やえっしがよー。
Ｍ：ぃやーが部屋や暑さぎさーえっとぅや。
Ｓ：クーラーんねんとぅ昼間や死にがたーなんどーやー。
Ｍ：大学ぬばーに国文科ぬある教授が、ウチナーやどぅく暑せーとぅ哲学とぅか文学すーぬ場所やあらん、でぃ言ちゃっくたんよーやー。
Ｓ：確かにどぅく暑せーねーから、ぬるんとぅるんしち物考えーやならんさ。
Ｍ：あんちや言ちん、仕事さんねー物かまらんくしぇーらさー。生活や大丈夫やえーみな？
Ｓ：我んなー？
Ｍ：ぃやーれーるさー。
Ｓ：もちろん、ウチナーじ物書ちゃーしち暮らすんでぃいうしや、簡単なくとぅやあらんささー。えっしが、我んやどぅーちゅいむんるえっとぅ、あんすかしわーやねんしがてー。若せぬばーからなままでぃ、いるいる経験ぬんしちちぇーとぅよー。生存能力やちゅーよか有んばーらんがやーりち思とぅしがてー。
Ｍ：あんえーねーしむしが。
Ｓ：話や変わいしが、大江・岩波沖縄戦裁判ぬん控訴審ぬ始またーさやー。
Ｍ：次にや結審ないがすら分からんでぃいうとぅ、てーげー進行やぺーさぎさーえっさーや。
Ｓ：原告側ぬちゃんねーぬ新証拠出じゃち、証人ぬん誰る出じゃすがやーりち注目しちゅたしが、拍子抜けしちゃーさー。争点ぬんうっぴんちゃーしか出じゃしゆさんたんばーれーがやー。座間味島ぬ宮平秀幸りいうぬちゅーん、けっきょくや証人ならんてーさや。
Ｍ：歳ゆい出じゃち恥かかしねーちむぐるさぬ。出じらんぐとぅ正解えってんばーらんな。
Ｓ：新証言りち文書や出じゃちぇーぎせーしが、うぬブログじん批判しちちゃーしがてー、原告側や自爆すんばーあらんな。藤岡信勝があまくまじ書ちゃい、あびたいしちゃっくしが、我から見ーねー、うぬちゅーてーげーどーばいえっさーりる思まりんばーよ。書ちぇーぬ評論読みば、けーてぃ梅澤かい不利ないぬくとぅ書ちゃっくんばーえっとぅ、てーげー珍らーせぬちゅーどーや。
Ｍ：どぅなーじ分からばーげーらや。ちらー見っちん、そーじんぶんあいぎさーやあらんしが。
Ｓ：原告側や代理人ぬん３４人から６人にぴなとぅんでいうとぅ、しんくぬ船からうぇんちゅぬぴんぎしとぅゆぬむんえっさーや。
Ｍ：あいやいちん、司法りいうしや上かいいちしんでー反動的ないとぅや。油断さんぐとぅなままでぃよかー応援しちかんねーならんしが。
Ｓ：あんすとぅや。