ウチナーぬ空やたーがむんが

Ｍ：前に書ちゅーぬ文章じ、普天間基地ぬ上空じ都市部ぬ戦闘訓練しちゅんでぃいうぬくとぅえっしが、いかなぬーやらばん、あんちまでぃ言ゃーりがやー。米軍えってぃんまぎ事故ぬ起くりば大事なんでぃいうしや分かいがはじえっとぅ、ないぬむんえーねーゆすに移転しち、なっぴん自由に飛ばりぬめーじ訓練すーしがましりち考えーてぃやうらんがや。
Ｓ：常識的に考えーりばあいえんばーえっしが、うぬ常識ぬ通用さんしがウチナーやあらんがや。米軍ぬウチナンチューぬくとぅ考えーてぃ、なまぬままえーねー危なせんでぃ思いば、はーまぺーくに別ぬ場所にむちなとぅたんばーあらんがや。米軍再編じ海兵隊８０００人ぬグアムに移駐すんでぃいちん、普天間ぬ実戦部隊やウチナーから出じらーりやさんばーえっとぅや、都市ぬ上空飛びぶせんばーらんな。
Ｍ：あいれーがや。
Ｓ：なまぬ普天間基地えってぃんよ、海ぬ上じ訓練さーり思いねーなんばーよ。飛行場から離陸しちすぐ太平洋やらばん、東シナ海やらばん飛じ行じや、海ぬ上じ訓練しーばしむんばーえっさ。えっしが、わざわざ宜野湾市の上空じ旋回しちゃいしち飛だっくせーや。うりやぬーりちり思いが。
Ｍ：わざとぅ市街地ぬ上空、飛どぅんり言ゅんばーな？
Ｓ：うり以外に考えーらりんな。市街地ぬ上空飛でぃ旋回すーしん意味ぬあんばーよ。市街地にや病院とぅか学校とぅかまぎビルとぅか目立つぬ建物ぬあいせーやー、米軍ヘリやうり敵ぬ拠点とぅか攻撃目標に見立てぃてぃや、攻撃すーぬたみに侵入、接近しちゃい、逆に攻撃さーらぬぐとぅ迂回しちゃい、都市ぬ戦闘想定しち、だんだんぬ飛びようしちゅんばーあらんがや。我んやあい思とぅんばーて。アメリカ軍ぬ訓練ぬ詳細明らかにすーぬくとぅやねんとぅ証明やならんしがよ。ただ飛びぬたみぬ訓練えーねー別に普天間基地使らんてぃんしむんでぃ思いんばーて。
Ｍ：まーや、市街地ぬど真ん中にあいぬ基地りいうしや、あまくまにあいぬむぬやあらんとぅや。普天間基地以外じやならーぬ訓練すーしん、米軍えーねーしーぎさーやえっしが。
Ｓ：ほんとによー、普天間基地以外にやねんばーよ、都市上空じ訓練ないしや。うりが他ぬ国えーねー許さらんでぃ思いしが、世界ぬ非常識ぬウチナーじや通ーとぅんばーて。
Ｍ：最近、ガバン・マコーマックりいうぬちゅーぬ『属国』りいうぬ本読だーしがてー、日本やアメリカぬ属国るえーる、りいうぬ主張しちゅんばーえっさ。読みがちなー、あいえっさ、り納得しちゃんばーえっしが、戦前やイギリス、戦後やアメリカりち、世界ぬ大国にたっくゎーてぃ生ちちゅんでぃいうしが、近・現代ぬ日本ぬ姿えったんり指摘さっとぅたんよ。戦後ぬ自民党政権やアメリカぬ言いなりなてぃ、憲法九条よか日米安保条約優先しみてぃちゃんばーえっさ。平和憲法持ちがちなー世界最強ぬ米軍に依存しち、朝鮮戦争、ベトナム戦争、イラク戦争りちアメリカ軍ぬ手がねーしち、うぬ矛盾やウチナーかい集中しみてぃや。日本やアメリカぬ属国、ウチナーや属国ぬ中ぬ植民地。あんち考えーりねー、世界ぬだーにんねーらん、市街地ぬど真ん中にあいぬ普天間基地使てぃ、世界ぬだーじんならーぬ都市上空ぬ訓練すんでぃいうしん、あいがすら分からんやー。
Ｓ：情けない話えっしがよー、マコーマック氏ぬ言うぬぐとぅ、日本やアメリカぬ「属国」りしか思まらんばーてー。日本政府やアメリカぬ言いなりなてぃ、ウチナンチューぬんおとなしいえっとぅよ、アメリカ軍ぬんうしぇーとぅんばーえっさ。沖縄国際大学に米軍ヘリぬ墜落しちゃーぬばーえってぃんよ、他ぬ国えーねー暴動ぬ起くてぃんおかしくねんばーえっしが、ウチナンチューや集会しちゃい、コンサートしちゃいしち終わいるえっとぅよ。墜落直後えってぃん抗議行動やさんぐとぅ、携帯じ写真る撮ったーくとぅや。うりびかーあらん、事故ぬ後ん、思いやり予算りいうぬ銭や変わらんぐとぅ出じゃちとぅらすんばーえっとぅ、あんねーぬ国ん地域ん、ゆすにやじょいあんなー。アメリカ軍にうしぇーらりしん当てーめーえんばーてー。
Ｍ：確かにやー、イラクとぅかアフガニスタンじ戦争しちゅーぬ海兵隊からしーねー、ウチナーや天国げーら分わからんさーやー。
Ｓ：あんねーぬ国、地域るえっとぅ、ちゃんねーぬ訓練えってぃんなんばーえっさ。軍隊りいうしや山岳部、砂漠、密林、都市、それぞれぬ条件に合ーち訓練すーぬ必要ぬあんでぃ思いしが、都市上空じヘリ訓練ないぬめーりいうしや普天間基地以外にやねんばーらんな。日本政府やアメリカ軍ぬぬーさーばん、はいどうぞ。ウチナンチューやおとなせん。うっさー好条件ぬするとぅんばーえっとぅ、アメリカ軍ぬうり最大限に生かさぬ理由やねんり思いしが。
Ｍ：めーなちやー、ちゅーぬちぶるぬうい飛だっくし見ーねー、撃ち落としぶせーしがやー、うりんならん。
Ｓ：色んな手段使てぃよ、アメリカーたーぬウチナーかい居いぶくねんでぃ思わすしかねんばーよ。どぅく綺麗事ばかり言らんぐとぅや。ちゅー見っち相手んさんねーよ。
Ｍ：都市ゲリラぬ必要げら分からんやー。話や変わいしが、名護ぬ琉銀ぬ向かいぬゴリラりいうぬ居酒屋ぬ閉店しちやー。
Ｓ：ゲリラやあらんぐとぅゴリラな？あいれんな、スクリーンじスポーツ中継流ち、週末やてーげー客入っちゅぬぐとぅあいたしが、平日やいけらーせーたんばーげーらやー。ワールドカップじフランスぬジダンぬ頭突きかまちぇーぬ試合、ゴリラじ見っちゃし思い出すーさー。
Ｍ：やっぱり経営が厳しいえったんばーがーやー。
Ｓ：理由とぅしちやうりがまぎせんでぃ思いしが、まちなか市営住宅ぬ問題ぬんからでぃやうらんがやー、はっきりやさんしが。
Ｍ：名護十字路周辺に建設反対ぬ立て看板ぬあまくま立っちゅんよ。えっしが、くぬめーぬ照屋全哲議員ぬ一般質問んかい大東ぬ住民ぬん十名びかー傍聴しちゅたしが、うぬばーぬ様子見ーねー、条件闘争に変わとぅぬぐとぅあいたんやー。
Ｓ：公民館新築しち道路整備しーねー受け入れすーぬぐとぅあいたさ。市当局や市街地ぬ人口ぬうぽーくないねー購買力ん増加すんでぃ言ちゃっくんばーえっしが、市営住宅造たとぅりち名護十字路一帯ぬ活性化すんでぃや思らんしがや。
Ｍ：住人ぬうぽーくないしや良いくとぅり思いしがや、ただ、十字路周辺にふかからんちゅーぬしーぶせんでぃ思いぬ店ぬ、ちゃぬあたいあいがやーりいうしが一番ぬ問題やあらんがや。ゴリラやにーせーたーぬ集まいぬ良い場所えったんでぃ思いたしが、勿体ないえっさーやー。
Ｓ：自民党ぬ総裁選挙から衆議院選挙から政治家やわーわー騒じゃっくしが、庶民や居酒屋じ酒飲みぬ銭んねーらんばーよ。家ーじ発泡酒る飲だっくとぅや。北部振興策ぬ銭んだーにが流りてぃ行じゃーら。
Ｍ：銭や流れてどこどこ行くの～、政治も流れてどこどこ行くの～。
Ｓ：我んねー目涙る流りーる。