道理んねーらん

Ｍ：暑せんどーやー。
Ｓ：昼や２６度ん余てぃ夏日ぬ続ちゅーとぅや。扇風機しきらんねー暮らさらーぬ。
Ｍ：ウチナーぬ一番ぴーせーしや２月えったんでぃ思いしが、今年や１月ぬぴーせーたぬ分、２月になってぃからやめーなち温さぬ、キャンプしちゅーぬプロ野球球団や最高げら分からんしが、うぬ暑さやどぅくろーやー。
Ｓ：あんち温せーとぅげーら、今年やイッペーぬ花ぬ咲ちゅしんぺーさぬ、名護ぬん歩道ぬ街路樹じあまくまに植いっらとぅーしが、なー満開なてぃ散りがたなっとぅぬ木ーんあいぬあたいえっさ。
Ｍ：最近やフブキバナんうぽーくなてぃ、あまくまーじ咲ちゅーし見ーるんや。
Ｓ：うぬ木ーぬん五、六年前からゆー見ーぬぐとぅなったんばーえっしが、いっとぅちじあんち広まてぃや。
Ｍ：ウチナーぬ地ーぬゆー当たとぅんばーれーくしぇーらさー。
Ｓ：葉桜ぬ緑に黒木ぬ若葉んすらさぬ、やがてぃやヤンバルぬ森ぬ若葉ん見物なんやー。
Ｍ：うぬめーにツツジぬ咲ちゅせーやー、ヤンバルにや良い季節にないさ。
Ｓ：話しや変わてぃ麻生首相ぬアメリカんかい行じ、オバマ大統領とぅ会談しちゅんばーえっしが。
Ｍ：わざわざ英語までぃ使てぃ見してぃや、外交じ支持率上ぎるんりち必死えっさーやー。
Ｓ：酒飲でぃさーぷーぷーしち会見しち、辞職しちゃっくぬどーぱぎ大臣ぬん居てぃや、極右タカ派ぬどぅしまでぃん麻生ぬ足引っぱとぅんばーえっとぅ、必死んないるする。
Ｍ：アル中中川や。うぬひゃーや二世ぬボンボンぬくせに、ちゃー草膨っか物言いしちゃっくてーとぅ、ゆーしってーるえーる。酒飲でぃにーぶいしちゃっくしや、椿鬼奴んかい蹴り一発入りらしぶさぬ。
Ｓ：クリントン国務長官がアジア訪問ぬ最初に日本かい来やんとぅか、ホワイトハウスじ会談しちゃーぬ最初ぬ外国ぬ首脳が麻生えったんとぅか、政府ぬんマスコミぬん一生懸命「アメリカの日本重視」ぬ現れりち宣伝しちゅんばーえっしが、ぬーげらうぬ様子見ーねー、うぬたーちぬくとぅ実現しち「アメリカの日本重視」演出すーぬたみに「グアム移転協定」結だんばーれーがやーり思いぬあたいるえんでー。
Ｍ：協定ぬ背景やいろいろあんでぃ思いしが、うりんあいがすら分からんやー。そもそもグアムじ造いぬ米軍基地までぃ日本が銭払いんでぃいうぬくとぅ自体がおかしいえんばーてー。なまや百年に一度ぬ経済危機り言やっとぅんばーえっしが、年度末めーなってぃ日本ぬん失業者が急増さーりしちゅーむん、米軍ぬたみにうわーばい銭使らーりしちゅんばーえっとぅや。あんち「献身的」に現金自動支払機ぬ役割果たちゅーぬ日本政府ぬたみに、アメリカんよーぴや気ー遣とぅんばーれーくしぇーらさー。
Ｓ：テレビぬニュース見ーねー、アメリカぬマスコミや麻生首相の訪米、全然相手にしちゅらんたんでぃいうしが、うりが現実えんばーえっしが。
Ｍ：麻生首相びけーあらん、日本ぬ国自体が粗相あちけーさっとぅんばーえっさ。あんねーぬ物言いしーねーナショナリズムにはまとぅんで言ゃーりぎさーえっしが、「属国」ぬ惨めさ直視すーぬ必要があんやー。
Ｓ：仕事んねーらん、家ーんねーらん、給料や安せん、あんちえーねー生活ならん、あい言ち泣か泣かーしちゃっくぬ人んまんどぅーむん、米軍ぬグアム移転ぬたみに何百億円りちどぅなーたー予算使いしにわじわじーさんばーげーらや。
Ｍ：たった１３％ぬ支持率しかねーぬ首相・内閣が、衆議院じ３分の２ぬ議席あんりちしーぶさ勝手しち、協定締結さーりしちゅんばーて。しわ寄せやむる弱せーぬめーかい押しちきてぃ。
Ｓ：しんじんとぅぐゎーわじーわじーすーさーや。道理んねーらんうったー勝手や絶対にゆるちやならんしが。